സപര്യ സാംസ്കാരിക സമിതി (കേരളം)

കലാകാരന്മാരുടെ സാമൂഹ്യ ഭവനം

കലാകാരന്മാരുടെ സാമൂഹ്യ ഭവനമായ സപര്യ സാംസ്കാരിക സമിതി 2018 ഫെബ്രുവരിയിൽ നിലവിൽ വന്നു.

കലാസാംസ്കാരിക രംഗത്തെ മുന്നേറ്റം ലക്ഷ്യം വെച്ചാണ് സമിതിക്ക് രൂപം നൽകിയത്. കേരളത്തിൻറെ സാംസ്കാരിക രംഗത്ത് സപര്യ സാംസ്കാരിക സമിതി കലാകാരന്മാരെ പ്രോത്സാഹിപ്പിക്കുന്ന ഒരു നിഷ്പക്ഷ പ്രസ്ഥാനമാണ്. കക്ഷിരാഷ്ട്രീയത്തിന് അതീതമായ സാംസ്കാരിക പ്രസ്ഥാനമാണിത്. കുറച്ചുകൂടി തെളിച്ചുപറഞ്ഞാൽ യാതൊരു രാഷ്ട്രീയ കക്ഷിയുമായും സപര്യക്ക് പൊക്കിൾക്കൊടി ബന്ധം പോലുമില്ല. ജാതി-മത- വർണ്ണ-വർഗ്ഗ-ലിംഗ രാഷ്ട്രീയ ഭേദമില്ലാതെ ഏതൊരാൾക്കും 'സപര്യ'യിൽ അംഗമാകാം. കലാകാരന്മാരുടെ സാമൂഹ്യ ഭവനം എന്നതാണ് സപര്യയുടെ ആപ്തവാക്യം. കേരളീയ കലകളിലും സാഹിത്യത്തിലും താൽപര്യമുള്ളവരാണ് സപര്യയിൽ അംഗങ്ങൾ ആകേണ്ടത്.

ലോക പ്രശസ്ത ശില്പിയായ കാനായി കുഞ്ഞിരാമൻ മുഖ്യരക്ഷാധികാരി ആയി പ്രവർത്തിക്കുന്ന സപര്യയുടെ പ്രവർത്തനം തികച്ചും നൂതനത്വം നിറഞ്ഞതാണ്. നാടിൻറെ സാംസ്കാരിക ഭൂമികയിൽ അതിനൂതനമായ ഒരു കാഴ്ചപ്പാട് സൃഷ്ടിക്കുക എന്നതാണ് സപര്യയുടെ ഉദ്ദേശ്യലക്ഷ്യം. മനുഷ്യനെ കർമ്മോജ്ജ്വലനാക്കുന്നത് അംഗീകാരങ്ങളും പ്രോത്സാഹനങ്ങളുമാണ് എന്ന് സപര്യ വിശ്വസിക്കുന്നു. പ്രാദേശികതലത്തിലും, ദേശീയതലത്തിലും, അന്തർദേശീയതലത്തിലും മികച്ച പ്രകടനം കാഴ്ചവെക്കുന്ന വ്യക്തികളെയും സ്ഥാപനങ്ങളെയും പ്രോത്സാഹിപ്പിക്കുന്നതിന് വേണ്ടി സപര്യ സാംസ്കാരികസമിതി നിഷ്കാമകർമ്മം ചെയ്യുന്നു.

സാഹിത്യ സെമിനാറുകൾ, ശില്പശാലകൾ, കവി സമ്മേളനങ്ങൾ, സാഹിത്യ രചനാ മത്സരങ്ങൾ, അഭിമുഖങ്ങൾ, പ്രഭാഷണങ്ങൾ, വിദ്യാർഥികൾക്ക് വേണ്ടിയുള്ള കൗൺസിലിംഗ്, തുറന്ന സംവാദങ്ങൾ മുതലായവയിലൂടെ ഭാരതീയ ഭാഷകളെയും സംസ്കാരത്തെയും സാഹിത്യത്തെയും സംരക്ഷിക്കുവാനും പ്രോത്സാഹിപ്പിക്കുവാനുമുള്ള നവീനമായ പദ്ധതികൾ സപര്യ സാംസ്കാരിക സമിതി ആവിഷ്കരിച്ച് നടപ്പിലാക്കികൊണ്ടിരിക്കുന്നു. കാസർഗോഡ് ജില്ലയിലെ കാഞ്ഞങ്ങാട് ആണ് സപര്യയുടെ ആസ്ഥാനം.